O Concello de Oroso vén de completar unha serie de melloras no Local de Maiores, realizadas ao abeiro dun convenio co Consorcio Galego de Servizos de Igualdade e Benestar da Xunta de Galicia.
As melloras implementadas no local de maiores de Oroso permitirán modernizar as instalacións e adaptalas ás necesidades da veciñanza. O alcalde de Oroso, Álex Doval, e o xerente do Consorcio, Perfecto Rodríguez, visitaron o renovado espazo para coñecer de primeira man o resultado das actuacións.
A reforma realizada incluíu a renovación do mobiliario, a mellora da iluminación, instalación dun sistema de climatización ou nova tarima e pintado interior. Estas melloras teñen como obxectivo ofrecer un espazo máis moderno, accesible e confortable para a veciñanza maior, que xa pode facer uso destas instalacións renovadas.
Durante a visita, o alcalde destacou que “estas actuacións responden ao compromiso do goberno local de mellorar a calidade de vida das persoas maiores, facilitando un lugar de encontro máis acolledor e adaptado”, mentres que o xerente do Consorcio subliñou “a importancia da colaboración institucional para seguir reforzando os servizos sociais de proximidade”.
