Bisbarra, 4 de febreiro do 2025 – Non é o mesmo o concello que a parroquia; se o primeiro ten varios locais sociais e mesmo un Auditorio, a parroquia de Oroso espera ter en pouco tempo o seu propio local social.
No último Pleno do Concello, Oroso aprobou un importante acordo que da luz verde á modificación do uso da parcela situada na parte superior do campo de fútbol de A Penela, que pasará de ter un uso dotacional deportivo de titularidade pública a un uso dotacional deportivo-sociocultural.
Este cambio è o primeiro paso para a construción dun novo Local Social na parroquia de Oroso, unha infraestrutura que busca fomentar a actividade veciñal e impulsar o movemento asociativo na zona. O goberno local destaca a importancia deste proxecto para ofrecer un espazo de encontro e dinamización, atendendo as demandas da veciñanza.
O alcalde de Oroso, Alex Doval, subliñou que “este acordo é unha mostra do compromiso do Concello con todas as parroquias do municipio, favorecendo o asociacionismo e dotando á veciñanza de espazos axeitados para a realización de actividades culturais e sociais”.
Lembrou tamén que esta obra foi un compromiso adquirido por outro executivo hai máis de dez anos, incluso estando xa orzamentada, pero que finalmente foi descartada para destinar eses fondos á compra dun tractor. “Este goberno levará a cabo a construción deste Local Social, cumprindo así cunha demanda histórica da veciñanza da parroquia”.
