Bisbarra, 4 de outubro do 2024 – O Concello de Oroso recibiu a visita oficial da embaixadora de Hungría en España, Katalin Tóth, quen rendeu homenaxe ao peregrino János Zádori, o primeiro húngaro coñecido que percorreu o Camiño de Santiago ao seu paso por Oroso hai 150 anos.
A embaixadora, acompañada pola tenente de alcalde, Lidia López, realizou unha emotiva ofrenda floral ante a placa conmemorativa de Zádori, situada nas inmediacións do Camiño en Sigüeiro.
A homemaxe a János Zádori simboliza non só a fraternidade entre os pobos húngaro e galego, senón tamén a importancia histórica e cultural do Camiño de Santiago como nexo de unión entre nacións e persoas de todo o mundo.
Durante o seu discurso, Katalin Tóth destacou a profunda conexión que o pobo húngaro sente co Camiño e lembrou a figura de János Zádori como un pioneiro que contribuíu a estreitar lazos entre Hungría e Galicia a través do Camiño.
Pola súa parte, Lidia López agradeceu a visita da embaixadora e expresou o orgullo de Oroso por formar parte deste legado histórico, manifestando o compromiso do Concello de seguir impulsando a relevancia cultural do Camiño de Santiago no municipio.
