Bisbarra, 25 de setembro do 2024 – O concello de Oroso ten previsto habilitar unha nova Casa da Xuventude, no actual centro cívico, antes de que remate o ano.
A Axencia Galega de Desenvolvemento Rural, AGADER, posibilita este novo espazo para a Casa da Xuventude cun orzamento de 50.000 €. O principal cambio será o traslado dos servizos de Protección Civil e Xulgado de Paz a outras instalacións municipais.
O obxectivo do novo espazo para a xuventude e conseguir un lugar no que os mozos e mozas de Oroso poidan realizar actividades e eventos destinados á súa formación e entretemento.
As obras da nova Casa da Xuventude incluirán unha reforma integral dos baños do edificio, coa finalidade de mellorar as súas condicións e adaptalos ás novas necesidades do espazo. Tamén está prevista a insonorización completa da escola de música, coa que compartirá edificio, garantindo así a compatibilidade entre as actividades que se desenvolvan en ambos lugares.
O alcalde de Oroso, Alex Doval, destacou a importancia desta nova infraestrutura para o concello, subliñando que “a Casa da Xuventude será un punto de encontro clave para a mocidade de Oroso, nun lugar renovado e adaptado ás súas necesidades”.
Este proxecto demostra unha vez máis o compromiso do Concello de Oroso coa creación de espazos que promovan o benestar e a participación activa da xuventude no municipio.
