Bisbarra, 2 de xaneiro do 2022 – O concello de Oroso estrea unha sala, na biblioteca municipal, que funcionará 24 horas os 365 días ao ano.
A sala da biblioteca conta cun sistema de apertura automatizada que permite acceder ao seu interior a calquera hora do día e da noite cun código numérico individual que toda persoa interesada pode solicitar na biblioteca de forma gratuíta.
O alcalde de Oroso, Luis Rey, e membros do goberno local acudiron á estrea da nova “sala intelixente” da biblioteca municipal situada en Sigüeiro e que xa comezou a funcionar.
Ademais de acondicionar o exterior destas novas dependencias e de instalar o sistema de acceso automatizado, o concello dotou a esta “sala intelixente” do mobiliario necesario para habilitar 26 postos de estudo, ademais de conexión wifi e un sistema de videovixilancia para garantir a correcta utilización das instalacións.
O alcalde, Luis Rey, que acompañou aos primeiros usuarios na estrea das instalacións, explicou que trátase “dunha iniciativa pioneira dirixida principalmente aos estudantes e aos opositores e que se implanta en Oroso a proposta dun grupo de mozos”. “Divulgade a existencia deste novo servizo entre os vosos compañeiros e amigos, utilizádeo para estudar e, sobre todo, coidádeo”, pediulle aos mozos e mozas presentes.
