Ordes, 11 de xuño do 2020 – O concello de Ordes lamentábase estes días no Facebook municipal dos moitos vertedoiros incontrolados que apareceron tras o confinamento.
A Policía local xa traballa na procura dos responsables de eses vertedoiros. Nas cunetas quedaron materiais de todo tipo, desde bañeiras a escombro pasando por ladrillos ou uralitas, como se pode ver nas imaxes publicadas polo propio concello.
O equipo de goberno pide a colaboración veciñal para identificar aos responsables. Lembra ademais que existe un punto limpo no que deixar moito do lixo e ademais hai contedores e illas verdes repartidas polo concello.
O concello lembra tamén que existe un servizo específico de recollida gratuíta de voluminosos que funciona o primeiro luns de cada mes no casco urbano e no segundo luns do mes no resto do municipio. Hai que chamar a semana anterior ao teléfono 639200204 ou enviando un whatsapp ao 616167131 coa rúa e o número ou o lugar da parroquia no que se ten que facer a recollida.