Ordes, 6 de febreiro do 2020 – O colectivo Salvemos a Comarca de Ordes denuncia que o concello de Ordes non eliminou ningún niño de velutina nos anos 2018 e 2019.
Nun comunicado a plataforma manifestan a súa preocupación polo “completo desleixo das Administracións autonómica e municipal ante o grave problema, ecolóxico, socioeconómico e para a saúdes das persoas, que representa a praga da vespa velutina na nosa comarca”.
Salvemos a comarca lembra que “Este insecto xa causou varias mortes en Galicia nos últimos anos, e a Axencia Galega de Emerxencia recomenda non acercarse a menos de 5 metros dos seus niños, pero o certo é que continua a resultar moi difícil que a veciñanza poida desfacerse deles cando aparecen cerca das súas casas e chaman á Administración. Sería lamentable ter que esperar a que suceda outra desgraza para comezar a tomar medidas políticas. Ademais, a velutina é especialmente agresiva coas abellas, animais importantes non só pola súa produción económica directa (mel), tamén como polinizadoras imprescindibles”.
O colectivo denuncia que as únicas accións nos últimos anos foron unha sesión formativa en 2016; á entrega en 2017 dunha pértega e dous traxes ao concello de parte da directora xeral de Gandeiría, Agricultura e Industria Agroalimentarias e un post no Facebook do concello cun croquis da Xunta de Galicia para a elaboración de trampas caseiras “Non nos parece que ningunha destas medidas sexa minimamente seria, e encoraxamos ao Goberno municipal a que tome cartas no asunto. En Galicia hai modelos municipais de éxito na loita contra a
velutina, como en Carballo, onde contrataron directamente unha empresa especializada que retirou case 800 niños no pasado ano; ou no Valadouro, onde reduciron a praga nun 83% grazas a un plan municipal de contención”.
Salvemos a Comarca de Ordes aporta ademais unha táboa, de elaboración propia, co número de niños nos concellos da zona.