Ordes, 26 de xuño do 2020 – O concello de Ordes aprobou en pleno un orzamento para o 2020 cercano aos dez millóns de euros, un crecemento do sete por cento con respecto ao ano pasado.
O PP de Ordes sacou adiante o orzamento en solitario. O Psoe optou pola abstención mentres que BNG e UXO votaron en contra. O pleno aprobou ademais distintas modificacións no PXOM.
UXO criticou a suba de impostos e a falta de un plan concreto para a reactivación tras a crise do COVID19. Unha boa parte da discusión xirou en torno as distintas actitudes durante a pandemia con acusacións mutuas pola falta de interés na búsqueda de consenso. As subvencións nominativas xeraron tamén dúbidas en UXO e o alcalde respondeu que inclúen as dos clubs deportivos e a da Cruz Vermella, mencionada de xeito concreto, é a solicitada pola ONG.
O BNG votou en contra dos presupostos municipais, ao botar en falta medidas para “tentar paliar os efectos que terá a Covid19 sobre o sector servizos, que é do que mais familias están a vivir no concello de Ordes, segundo as afiliacións en alta laboral que recollen as estatísticas do IGE, cun peso do 61,28%”.
Para Vidal, “a decisión de investir 1.315.035,57 € de achega municipal en cemento, chapapote e farois, resulta nunha clara mostra do abandono á súa sorte, no que o PP de Ordes deixa ao sector servizos nunha crise como a que estamos a vivir, pois queda acreditado que cartos hai, pero non vontade”.
Finalmente, desde o bloque puxeron de manifesto que “os datos demostran que o PP levou a cabo unha suba brutal dos impostos nos últimos anos” ao comparar as recadacións de IBI rústica e urbana nos presupostos do ano 2016 cos actuais, cifrando a suba “nuns 410.000 €, é dicir un 20,32 % mais”. Vidal achacou esta situación “ás situacións de maioría absoluta do PP, apoiados nos tránsfugas procedentes de UxO no caso do mandato anterior”.
Apoio a demanda de máis paradas na estación de tren
O BNG de Ordes conseguiu o apoio unánime da corporación municipal á súa moción para demandar a RENFE e ao Ministerio de Transportes que equipare o número de paradas que o tren rexional está a ofertar na estación do tren de Cerceda-Meirama coa de Ordes.
O voceiro nacionalista Pablo Vidal explicou que “para os traxectos A Coruña-Santiago-Vigo e Vigo-Santiago-A Coruña, a estación de Ordes oferta catro paradas diarias mentres que a de Cerceda-Meirama oferta seis”. O edil asegurou que “un servizo reducido e precario, non contribúe na potenciación do uso deste medio de transporte no noso concello, o cal é cabeceira de comarca”.
