Lidia Cao foi a encargada de decorar o CPI de Xanceda, en Mesía, abrindo así a terceira edición do Desordes máis apegado á terra.
A Mancomunidade de Ordes suma xa un novo mural ao seu extenso catálogo de arte urbano logo de que a ilustradora Lidia Cao dera por rematado o primeiro dos murais programados na terceira edición da iniciativa Desordes Xeodestino Mural.
O CPI de Xanceda, en Mesía, loce nunha das súas fachadas exteriores un mural que versa sobre a importancia de recoñecer e valorar as raíces que nos vinculan ao territorio rural.
A figura central, representada nun intre de contemplación, encarna a quen medra rodeada dun paisaxe que non só nutre a vida cotiá, senón tamén a identidade. A ollada cara ao horizonte suxire a procura dun futuro posible sen renunciar a aquilo que a define: a memoria, a terra e as ensinanzas herdadas.
En este novo mural do DesOrdes os paxaros que xorden do seu interior e a acompañan funcionan como metáforas de liberdade e aprendizaxe. Coa súa roupa, os elementos da paisaxe intégranse no seu propio corpo, afirmando que o territorio forma parte do seu ser.
As ramas que envolven a composición evocan a idea dun enraizamento vivo, dinámico, que medra e se expande. Non se trata dun arraigamento estático, senón dun vínculo que evoluciona coa persoa e do que xorden novas posibilidades. O mural celebra así a riqueza da orixe rural como un espazo de formación íntima, onde a aprendizaxe provén tanto da natureza como da comunidade e dos seus ritmos.
