Bisbarra, 30 de outubro do 2023 – A Xunta de Galicia volveu a denegar o Plan Xeral de Ordenación Urbana de Ordes por non cumprir a esixencia mínima de zonas verdes.
Esta denegación chega despois de que en xullo a Xunta de Galicia tamén rexeitara a súa aprobación, tal e como contamos en Lindeiros. Pese a que o concello introduciu numerosas modificacións no Plan Xeral, estas non foron suficientes e terá que ampliar o número de zonas verdes para chegar ao mínimo esixido.
Pablo Vidal, voceiro do BNG de Ordes, que advertira de que os cambios non eran suficientes di que “lamentablemente, o tempo volveu a darnos a razón cando no segundo pleno de aprobación provisional, xa advertimos que no documento aínda detectabamos erros e incongruencias, cabendo a posibilidade de que a aprobación definitiva non fose outorgada”.
Os nacionalistas engaden que a orde “obriga a emendar os cálculos errados sobre zonas verdes e espazos libres para cumprir o estándar mínimo, equilibrar a edificabilidade nos sectores de solo urbanizable, suprimir o núcleo rural do Cano de Leira para pasalo a solo rústico e adaptar a normativa no réxime dos edificios en situación fora de ordenación”.
Vidal, manifesta entender “a frustración dun alcalde que sempre intenta facer ver as abstencións acertadas do BNG coma un non ao Plan Xeral, mais debemos lembrar que quen realmente lle está a dicir que non ao documento, é a propia Xunta de Galiza”.
Reunións coa veciñanza
No pasado mes de setembro, o BNG finalizou a rolda informativa por tódalas parroquias do concello de Ordes, onde “expuxemos as modificacións que sufrira o P.X.O.M. na última aprobación provisional e respondemos as dúbidas formuladas pola veciñanza”.
Pablo Vidal, manifesta ledicia por “poder cumprir un dos compromisos adquiridos na campaña electoral, de reunirse coa veciñanza e informala dun documento tan importante como é o P.X.O.M., algo que debera ter feito o goberno municipal, mais preferiu permanecer agochado no seu despacho”.
