Bisbarra, 7 de novembro do 2024 – Un problema vello e enquistado do que non se fala e contra o que agora tentan loitar a mancomunidade de Ordes e o concello de Boqueixón: o suicidio.
A mancomunidade de Ordes coloca desde esta semana un punto informativo no CIM. O espazo contará con materiais de axuda e recomendacións sobre condutas suicidas, ao abeiro do programa “Falamos?” da asociación Andaina Pro Saúde Mental.
O punto informativo estará instalado ata finais de ano e os recursos de prevención do suicidio estarán accesibles para todas as persoas que acudan á oficina do CIM. O programa “Falamos?” da asociación Andaina Pro Saúde Mental, céntrase na mellora da detección e intervención en risco de suicidio en áreas rurais.
A través desta iniciativa, desenvólvense actuacións de sensibilización, información e asesoramento específico para persoas en situación de risco, así como formación para profesionais do eido socio-sanitario.
O Centro de Información á Muller (CIM) da Mancomunidade de Ordes ofrece información xurídica, atención psicolóxica, información sobre os recursos existentes na zona e calquera outra actividade que poida mellorar a igualdade entre homes e mulleres na comarca de Ordes.
A través deste servizo pódese acceder a asesoramento confidencial e gratuíto, os luns, martes e xoves, en Ordes, e os mércores e venres, en Oroso. O seu horario de atención é de 8:00 a 15:00 horas (de luns a venres), e pódese contactar no 981 682 108 e no enderezo cim@mancomunidadeordes.gal.
Boqueixón
Pola súa banda o Concello de Boqueixón aproveita o mesmo programa impulsado pola Andaina Pro Saúde Mental, en este caso o punto informativo estará colocado na entrada da casa consistorial e engade un punto de lectura na biblioteca municipal durante este mes de novembro. O punto informativo estará aberto na casa do concello no Forte ata finais de novembro, momento no que será trasladado ao centro de saúde do Forte, onde permanecerá durante o mes de decembro.
Paralelamente, a biblioteca municipal de Boqueixón contará durante o mes de novembro cun punto de lectura, no que pon a disposición dos veciños e veciñas unha serie de publicacións sobre conduta suicida e benestar emocional.
