Ordes, 11 de maio do 2020 – BNG, Psoe e Unión x Ordes, toda a oposición municipal, ven de solicitar de forma conxunta unha mesa de diálogo sobre a reactivación económica do concello.
Os grupos da oposición explican que “a veciñanza de Ordes non entendería que os grupos políticos da corporación municipal, ante unha situación como a que estamos a afrontar, non fosen capaces de manter unha postura de unidade, diálogo, comunicación, participación, debate e peche de acordos”.
A oposición quere que se inclúan aos sectores afectados
Co gallo de acadar un consenso o mais amplo posible, os citados grupos consideran que a mesa de diálogo debe estar constituída por “representantes de tódolos grupos políticos da corporación municipal, do comercio, da hostalería, do sector cultural, autónomos e PEMES”, mantendo reunións preferiblemente a través de medios telemáticos, que garanten o cumprimento das medidas preventivas fronte a posibles contaxios por COVID-19.
