Compostela, 9 de marzo do 2022 – Volve o Son do Camiño ao Monte do Gozo despois dunha edición “Perseidas” que tentou compensar o parón provocado pola pandemia.
Hoxe mércores saen a venda as últimas entradas dispoñibles cando aínda quedan por confirmar artistas. A hora prevista son as doce e media do mediodía e no seguinte enlace tes toda a información.
As entradas só se poden mercar no propio portal do Son do Camiño. Cada comprador ten dispoñibles seis entradas e só se piden os datos da persoa que fai a compra. Tamén recomendan usar un só navegador e non refrescar a páxina para non abandonar a cola virtual.
Unha edición con máis espazo
O Son do Camiño 2022 celebrase de novo no Monte do Gozo pero en esta ocasión hai máis espazo grazas as ampliacións realizadas no recinto que o aumentan nun vinte por cento. O festival incorpora ademais un terceiro escenario.
Existirá un plan de transporte e un de restauración. A zona de descanso estará habilitada este ano para catro mil persoas. A cita será o vindeiro mes de xuño, do 16 ao 18.
Artistas
A terceira edición do Son do Camiño contará con máis de corenta artistas internacionais. Destacan Liam Gallagher, The Chemical Brothers ou Jason Derulo. Os nacionais Dani Martín, C Tangana ou Rigoberta Bandini.
Os artistas galegos ocupan o corenta por cento do cartaz aínda que moitos deles non cantan en galego como é o caso de Triángulo de Amor Bizarro, The Killer Barbies ou Sen Senra.
Sostenibilidade e igualdade
O Son do Camiño 2022 amplía o manual para os traballadores de cara a conseguir un festival máis sostible. O uso de provedores galegos é tamén unha das prioridades.
O Son fomentará o uso do transporte público, terá recollida selectiva de residuos e xeradores enerxéticos e iluminación máis eficiente. Os baños levarán certificado medio ambiental.
O Monte do Gozo terá un punto violeta de prevención da violencia sexista e os traballadores terán formación específica en igualdade. O Festival terá ademais un plan de accesibilidade para os colectivos que o necesiten.
