Arzúa . 1/07/2026 – A Concellería de Turismo de Arzúa, dirixida por Begoña Balado, organiza o sábado 4 de xullo a charla “A eclipse das nosas vidas” e un obradoiro práctico sobre o fenómeno astronómico. Unhas actividades abertas ao público de cara á cita do 12 de agosto.
A xornada estará guiada por Dosi Veiga, licenciado en Física, responsable de AstroGalicia e do proxecto Ceos Galegos e coautor, xunto a Jorge Mira, do documento do Consello da Cultura Galega “Esperando a eclipse total de sol. Recomendacións para as administracións públicas e a cidadanía”.
Programa da xornada
As actividades desenvolveranse na antiga Casa de Correos de Arzúa. A charla “A eclipse das nosas vidas” dará comezo ás 12.00 horas e permitirá aos asistentes descubrir que fai tan especial esta eclipse, que poderá verse ao longo do fenómeno e por que se trata dun evento único que non volverá repetirse en centos de anos.
A continuación, ás 13.00 horas, celebrarase un obradoiro práctico no que os participantes aprenderán a construír unha cámara escura para observar a eclipse con seguridade, coñecerán o uso correcto dos filtros solares, descubrirán diferentes sistemas para proxectar a imaxe do sol e recibirán orientación para organizar pequenas observacións públicas.
Arzúa, punto estratéxico para a observación da eclipse
A concelleira de Turismo, Begoña Balado, anima á veciñanza e ás persoas visitantes a participar nesta iniciativa porque “a eclipse solar do 12 de agosto representa unha oportunidade única e queremos que Arzúa estea preparada para vivila nas mellores condicións. O noso concello será un punto comarcal estratéxico para a observación deste fenómeno, polo que é importante ofrecer á cidadanía ferramentas para desfrutalo con seguridade”.
A actividade é gratuíta, pero require inscrición previa a través do correo electrónico info@turismoarzua.gal, xa que as prazas son limitadas.
