Tramo da autovía entre Brión e Urdilde, imaxe de google maps
Brión, 27/05/2026 – Unha vella demanda de toda a bisbarra era o desdobramento da autovía AG-54 desde Brión a Noia. Trátase dunha zona pola que circulan 13.000 vehículos diarios e cunha poboación de 160.000 persoas que se incrementa no verán.
O presidente da Xunta, Alfonso Rueda, supervisou este luns o avance das mencionadas obras de conversión. Rueda avanzou en esta visita que a previsión do Goberno autonómico é que esta nova vía “poida abrirse e entrar en funcionamento durante o 2027”.
As obras que se levan a cabo na actualidade son as do primeiro treito, que une Brión e Urdilde (Rois). O titular do Executivo galego estivo acompañado na súa visita pola conselleira de Vivenda e Planificación de Infraestruturas, María M. Allegue.
Nesta primeira fase, que supón desdobrar os primeiros 4,9 km desta vía de altas prestacións e un investimento de 11,2 millóns de euros, xa se executou arredor do 10% do total do proxecto, con traballos centrados fundamentalmente en labores previos como a roza, drenaxes ou movementos de terras.
A nova infraestrutura será similar á autovía Santiago-Brión, dispoñendo de dous carrís de 3,5 metros de ancho en cada sentido da circulación. Rueda salientou que, máis alá das cifras técnicas, o verdadeiramente importante desta obra é o beneficio directo que supón para o día a día das persoas e para a mellora da súa calidade de vida.
Rueda engadiu que “As infraestruturas son para mellorar a vida das persoas, non para complicala”, e asegurou que construír autovías implica “máis seguridade vial, máis comodidade, máis rapidez e máis desenvolvemento”.
