Rois, 4 de maio do 2021 – A moción socialista que pedía a consolidación dunha parte dos traballadores do concello de Rois non contou coa aprobación do pleno municipal.
A petición reclamaba que os empregados contratados antes do ano 2005 foran consolidados como funcionarios. O alcalde, Ramón Tojo, argumentou que “xa se consolidaron postos de traballo e seguimos conversando cos traballadores para seguir en esta liña polo que a moción non ten sentido”.
A petición foi rexeita polos sete votos do Partido Popular e contou cos favorables do Psoe, 3, e o BNG, 1.
AP9 e banca
O Pleno si aprobou, por unanimidade, dúas mocións presentadas polo BNG sobre a AP9 e o peche de oficinas bancarias no rural, o incremento de comisións e o despido de traballadores.
Begoña Ares recordou na moción sobre a AP9 que o Parlamento galego xa aprobara por unanimidade reclamar a transferencia da autoestrada a Galicia, e que a rebaixa das peaxes xa debería terse aplicado nesta vía, porque é importante para a economía da nosa comunidade e tamén para Rois.
Na réplica, o alcalde, Ramón Tojo, recordoulle ao BNG que na época do bipartito na Xunta, no ano 2008, votara no Parlamento de Galicia en contra da reclamación da transferencia da AP9 a Galicia, e que na actualidade está apoiando en Madrid a un goberno que permitiu que esta autoestrada teña a maior subida de peaxes de toda España. “Dende o PP queremos a transferencia da autoestrada a Galicia, motivo polo que apoiaremos a moción”.
O PSdeG tamén apoiou a moción, solicitando que se faga a transferencia con garantías, e aproveitou a postura do BNG para recriminarlle a falta de apoio aos orzamentos deste ano no Congreso dos Deputados. A proposta foi aprobada por unanimidade.
O recorte de servizos bancarios no rural, con peche de dúas oficinas en Rois, e a redución de horario de atención na que queda de Abanca en Antequeira, así como o incremento das comisións bancarias, foron dous dos argumentos da moción que presentou o BNG solicitando que se tomen medidas para evitar deterioro destes servizos no rural.
Ramón Tojo recordou que este é un problema global e que dende o Concello fíxose e farase toda a forza posible para que Rois siga contando con oficinas bancarias para darlle servizo a veciñanza. “Estamos e seguiremos traballando para que non se reduzan servizos bancarios á veciñanza”, asegurou o alcalde. No mesmo senso se manifestou a segunda voceira socialista, Patricia Ces, que lle pediu ao Concello que siga reclamando que non se reduza o horario da única oficina que hai no municipio. A proposta aprobouse por unanimidade.
Seguridade viaria
Respecto da petición socialista para iniciar un expediente que analice as actuacións que se poidan acometer para mellorar a seguridade viaria na estrada provincial que pasa pola Meana á altura do cruce coa estrada local, o alcalde replicou que o Concello vai poñer unha sinal prohibindo aparcar nese cruzamento, para mellorar a visibilidade na estrada. “Na zona hai visibilidade, salvo nesa curva perigosa que ten a estrada da Deputación”, dixo Tojo. O grupo popular votou en contra (7) e a oposición a favor (4), polo que a moción foi rexeitada.
