A diosa da neve, gañadora infantil
O Pino xa ten todo preparado para o Entroido 2026 e este ano chega cunha destacada novidade xa que por primeira vez o Concurso de Disfraces, que alcanza a súa XXVI edición, desenvolverase cun desfile polas rúas do Pedrouzo, reforzando o carácter participativo da cita.
O evento celebrarase o domingo 15 de febreiro, a partir das 17.30 horas, cun percorrido que partirá da rúa dos Mollaos, atravesará a praza de Forcarei e rematará na praza do Concello onde, como é tradición, haberá unha carpa e se celebrará unha gran festa.
Con desfile de Entroido o Concello do Pino busca dar maior visibilidade a esta festa, favorecer a interacción co público e seguir potenciando unha celebración que combina tradición, creatividade e dinamización social.
O certame de Entroido está aberto á participación de persoas individuais e agrupacións, sempre que cumpran os requisitos establecidos nas bases reguladoras. No caso de participantes menores de idade, será necesaria a correspondente autorización do representante legal.
Categorías e premios
O XXVI Concurso de Disfraces de Entroido manterá as sete categorías competitivas, todas elas con premios en metálico, mantendo os mesmos importes que na pasada edición.
Na categoría infantil, dirixida a nenos e nenas de ata 12 anos, establécense dous premios: 150 euros para o primeiro posto e 100 euros para o segundo. O premio na modalidade individual adultos será de 150 euros, mentres que as parellas optarán a unha dotación de 200 euros.
Os grupos, formados por entre 4 e 9 persoas, competirán por un premio de 300 euros, ao tempo que as comparsas, cun mínimo de 10 integrantes, poderán acadar un premio de 700 euros. As carrozas, que deberán contar con polo menos 4 persoas sobre unha estrutura móbil decorada, estarán dotadas cun premio de 500 euros.
Como recoñecemento á creatividade e á innovación, outorgarase tamén un premio específico ao disfrace máis orixinal, cunha dotación económica de 200 euros. O xurado do Entroido valorará a orixinalidade, a posta en escena, o uso de materiais reciclados e o fomento da lingua galega.
As agrupacións poderán realizar pequenas representacións (3-4 min) para gañar o favor do público e do xurado. Os premios entregaranse durante o propio evento e serán abonados posteriormente mediante transferencia bancaria, previa presentación da documentación requirida dentro do prazo establecido nas bases.
Inscricións
O prazo de inscrición permanecerá aberto ata o propio día 15 de febreiro de 2026. As solicitudes poderán presentarse a través da sede electrónica municipal; de xeito presencial no Rexistro do Concello do Pino; e tamén o mesmo día do evento, entre as 16.00 e as 17.00 horas, antes do inicio do desfile.
As bases completas do XXVI Concurso de Disfraces do Entroido 2026, así como os formularios de inscrición, estarán dispoñibles na web www.opino.gal.
Para máis información, as persoas interesadas poden dirixirse ao Departamento de Educación e Cultura, na Casa da Cultura (Rúa do Peregrino, 10), ou chamar ao teléfono 981 511 065.
