Bisbarra, 27 de decembro do 2024 – En toda a bisbarra existen antigas escolas unitarias sen utilizar, cada vez menos, e un dos usos aos que se comezan a destinar eses inmobles e o de casas do maior.
O Pino é un dos concellos que aposta por esta solución no futuro inmediato. No vindeiro ano o municipio disporá de dúas casas do maior nas unitarias de Ferreiros e Lardeiros, recentemente acondicionadas para tal fin.
Estas casas do maior serán atendidas por dúas autónomas do concello. Terán un máximo de dez ocupantes maiores de 60 anos durante 40 horas semanais, de luns a venres laborais. O obxectivo é dedicar a metade da planta baixa de ambos os edificios para poder atender a estes usuarios.
Trátase dun servizo gratuíto de atención diúrna a persoas sen dependencia ou en situación de dependencia de grao I ou II, que estean empadroadas no Pino. En cada casa do maior pódense atender a un máximo de cinco persoas.
O servizo, atendido por unha persoa autónoma ou cooperativas de traballo asociado, está aberto todo o ano agás festivos e un mes de vacacións. O Concello non descarta habilitar máis locais noutras parroquias se hai demanda para poñer en marcha máis unidades deste servizo.
No último Pleno, o alcalde, Manuel Taboada, explicou que o Concello aposta por este servizo fronte ao centro de día, “porque a casa do maior é gratuíta e no centro de día as persoas usuarias teñen que pagar sobre 500 euros mensuais”. O alcalde tamén indicou que nas casas do maior o transporte pode ser gratuíto para as persoas usuarias.
No caso de Lardeiros e de Ferreiros hai dúas mulleres do municipio que xa solicitaron poñer en marcha as dúas casas do maior, por iso o Concello acondicionou os locais para que poidan estar en funcionamento o antes posible. En ambos casos, o espazo dedicado a casa do maior contará con zona de estar ampla, cociña, despensa e baños adaptados.
“Se hai más persoas autónomas interesadas en montar casas do maior noutras parroquias, dende o Concello facilitaremos e acondicionaremos os edificios para achegar este servizo tan importante a nosa veciñanza”, dixo Manuel Taboada no Pleno.
“Con catro casas do maior xa podemos ofrecer o mesmo servizo que nun centro de día de 20 prazas, e facelo máis preto da residencia habitual dos veciños e veciñas que precisen do servizo, polo que pensamos que vai ser máis beneficioso para todos”, dixo Manuel Taboada no pleno en resposta a unha pregunta formulada polo grupo socialista.
Residencia de maiores
No pleno celebrado o 16 de decembro, no que se aprobaron os orzamentos para 2025, Manuel Taboada explicou que aínda que o Concello aposta agora polas casa do maior fronte ao centro de día, segue mantendo a necesidade de contar cunha residencia para persoas da terceira idade.
“Seguimos negociando coa Consellería de Política Social a construción dunha residencia para persoas maiores”, indicou Taboada. Con este obxectivo, o Concello é propietario dunha parcela que mercou en Arca, en fronte do centro de saúde, do colexio e da casa de cultura.
