Bisbarra, 23 de setembro do 2022 – O PSdeG do Pino reclama axudas para todos os estudante do concello e critican que a convocatoria se limite a só 10.
Os socialistas levarán a proposta ao pleno ordinario da vindeira semana. Queren que se saque unha convocatoria de axudas a estudantes que chegue a todos os censados no temo municipal. Lembran que a situación económica esta sendo moi complicada pola suba da inflación.
Ante este escenario sinalan que hai moitas familias con fillos en idade escolar, e, en situación vulnerable, que teñen que facer fronte a diferentes tipos de gastos como son; o comedor, o material escolar, matrículas, e as actividades extraescolares.
Dada esta situación extraordinaria, solicitan medidas tamén extraordinarias co obxecto de axudar a sufragar estes gastos a quen máis o precisa, “aínda que para iso se teñan que asumir de forma excepcional competencias impropias”, sinalan desde o PSdeG do Pino.
Censuran duramente a convocatoria de axudas que acaba de publicar o Concello, que está limitada a 10 bolseiros que cursen estudos universitarios ou de ciclo formativo superior, “a convocatoria dispón dun crédito irrisorio, 3.000€, cando o Concello xestiona un orzamento anual de 4 millóns de euros”, critican.
Na súa proposta solicitan ao Concello que no presente exercicio, de xeito excepcional e extraordinario, convoque axudas para tódolos estudantes censados no termo municipal, independentemente dos estudios que cursen, e tan só condicionada aos topes de ingresos que se establezan por unidade familiar nas bases da convocatoria.
