O Pino, 7 de decembro do 2021 – O concello do Pino aprobou uns orzamentos de catro millóns de euros para o vindeiro 2022.
O Pleno da Corporación do Pino aprobou ademais un plan de obras de tres millóns de euros financiado con fondos propios. Uns proxectos que inclúen a construción de doce quilómetros de sendas peonís.
Tamén se aprobou o segundo plan de igualdade entre mulleres e homes e a elaboración do terceiro plan 2021-2025. Ademais, déuselle o visto bo a bonificar a contribución a outras dez explotacións gandeiras ou agrícolas (cinco ao 95% e cinco ao 50%).
Os presupostos para o ano 2022 destinan 700.000 a investimentos reais e 2,2 millóns a gastos en bens correntes e para pagar os servizos como a recollida de lixo ou o alumeado público.
O Pino mantén a cero a débeda cos bancos, polo que tan só ten destinados 200 euros a gastos financeiros e reserva 227.000 euros para transferencias correntes, nas que se recollen as partidas para subvencións ou diferentes achegas. O alcalde, Manuel Taboada, destacou que nestes presupostos xa figuraban catro subvencións nominativas, para a Banda de Música de Arca (12.000 euros), a ANPA (7.000 euros), o CPI Camiño de Santiago (3.000 €) e a SD O Pino (10.000 euros)
En investimentos reais, figura unha partida de 698.000 euros. Á construción e mellora de estradas destinaranse preto de 200.000 euros, dos que 118.596 se corresponden con obras recollidas no POS+ 2022. Tamén se contemplan 300.000 euros para intervencións en terreos, parques e xardíns e outros 37.000 euros para a compra dun tractor. Así mesmo, 70.000 euros dedicaranse a manter os alumeados e resérvanse 100.000 como aportación municipal para a construción do centro de día que se vai construír en Arca e que terá un custo de arredor dun millón de euros.
No que se refire ao apartado de ingresos, o Concello do Pino prevé recadar 1,6 millóns en impostos directos e outros 434.000 en taxas. As transferencias procedentes doutras administracións (Estado e Xunta) ascenden a 1,8 millóns de euros, e as transferencias de capital suman 142.000 euros para a execución de obras.
Os orzamentos, que contan con informes favorables de Secretaría e Intervención, foron aprobados cos votos a favor do equipo de goberno popular (6) e en contra do PSdeG (1) e do BNG (2).
Plan de obras con 3 millóns de fondos propios
Outro dos puntos importantes do pleno foi a aprobación dun ambicioso plan de obras financiado con 3 millóns de fondos propios do Concello, que se corresponden co remanente positivo de tesourería de anos precedentes.
Este plan contempla a construción de 12 novos quilómetros de sendas peonís, que permitirá estender este tipo de infraestruturas á totalidade das trece parroquias do municipio “co obxectivo de mellorar a seguridade viaria da veciñanza”. As obras executaranse durante o vindeiro 2022 e inclúen tamén a mellora de pistas, camiños e vías interiores de diferentes aldeas do municipio.
O plan foi aprobado cos 8 votos a favor de PP e BNG e 1 voto en contra do PSdeG xa que as dúas concelleiras socialistas non puideron asistir hoxe ao pleno por motivos laborais.
A execución do plan conta co informe favorable da Secretaría-Intervención municipal, xa que a lexislación vixente permite que os concellos poidan destinar o remanente positivo de tesourería a execución e mellora de infraestruturas.
O remanente ascende a 3,21 millóns de euros. Para sufragar estas obras, aprobouse un suplemento de crédito sobre estes cartos por un total de 3,03 millóns. Deste xeito, e logo de acometer o plan, ao Concello quedaranlle aínda 200.000 euros de saldo positivo.
Plan de igualdade e bonificacións do IBI
Na sesión desta mañá tamén se aprobou a avaliación do segundo plan de igualdade entre mulleres e homes e decidiuse comezar a elaboración do terceiro plan 2021-2025.
O primeiro punto da sesión foi a declaración de especial interese ou utilidade municipal de dez explotacións gandeiras e agrícolas dedicadas ao sector primario no municipio, o que lle vai permitir aos seus propietarios obter unha bonificación no recibo da contribución (IBI) do 95% en cinco casos e do 50% noutros cinco.
