SONY DSC
Bisbarra, 27 de xullo do 2018 – O pleno da Deputación da Coruña aprobou, na sesión ordinaria de xullo, o convenio pola que se establecen as bases de colaboración cos concellos de Ames, Brión, Santiago de Compostela, Teo e Val do Dubra para a creación do parque Compostela Rupestre.
O proxecto, constituído como Comunidade Intermunicipal, terá como obxecto a xestión conxunta do parque Compostela Rupestre co fin de agrupar os medios persoais e materiais e recursos económicos das corporacións participantes para xestionar de forma conxunta a promoción e posta en valor da arte rupestre localizada no territorio dos municipios implicados. Según o Deputado Xosé Regueira, Presidente da Comisión de Cooperación, Plans Provinciais, Turismo e Patrimonio ” O proxecto de Parque Compostela Rupestre forma parte do itinerario da Deputación e súmase ao proxecto do primeiro xeoparque en Ortegal e ao Parque do Megalitismo da Costa da Morte. Neste caso trátase de conservar e promocionar o rico patrimonio rupestre da comarca de Compostela, infelizmente, aínda moi descoñecido”.
Desde o ámbito do Turismo e Patrimonio, Xosé Regueira apunta que o Val da Maía é “un territorio moi rico patrimonialmente que pode ser tamén rendíbel social e economicamente, o que é un dos obxectivos deste proxecto participado pola Deputación e os concellos”. Coa constitución da comunidade intermunicipal preténdese realizar actividades conxuntas relacionadas non só coa conservación e difusión da arte rupestre, senón tamén as relativas a paisaxe e ao medio ambiente, á defensa e posta en valor do patrimonio cultural, normalización lingüística e outras que se consideren de interese público local e necesarias para o axeitado desenvolvemento do proxecto.
Os cinco concellos aprobaran xa con anterioridade a integración no proxecto de parque arqueolóxico Compostela Rupestre que a Deputación da Coruña dotará con 500.000 euros para o seu desenvolvemento. O convenio terá vixencia de catro anos prorrogábeis por outros tantos e a presidencia da entidade comezará polo concello de maior poboación, é dicir, Santiago de Compostela.
