Compostela, 10 de febreiro do 2021 – O Museo do Pobo Galego entroidará online cunha nova edición das xornadas dedicadas ás Máscaras Tradicionais.
A actividade terá lugar os días 11, 12 e 16 de febreiro ás 7 da tarde a través da canle de Youtube do Museo do Pobo. Neste ano, no que esta festa será tan diferente a outros, o Museo quere aproveitar o soporte dixital, coñecer outras máscaras da península ibérica nun percorrido que irá de Podence (Trás-Os-Montes, Portugal) a Toén (Ourense) pasando por Riofrío de Aliste (Zamora), compartindo o espírito resistente e creativo de Caretos, Carochos, Labardeiros e Señoritas.
O venres a proposta vai ata Riofrío de Aliste (Zamora) para coñecer aos Carochos ou Zangarrones da man de Juan Francisco Blanco, autor do libro Los Carochos. Rito y tradición en Aliste e Rubén Gago, membro da Asociación Amanecer. Esta figura forma parte das diversas mascaradas de inverno que hai no norte de peninsular e sae cada 1 de xaneiro polas rúas da vila. Nesta saída os Carochos representan unha función teatral que mestura bailes, cantos, ritos de fertilización da terra, carreiras, pelexas entre personaxes e moito humor. Esta festa está declarada de Interese Turístico de Castela e León dende 2002.
A última xornada terá lugar o 16 de febreiro e estará dedicada ao entroido de Mugares (Toén) coas figuras dos Labardeiros e Señoritas, dúas das súas personaxes principais. Nela intervirán Ángeles Iglesias DaSilva (Presidenta da Asociación de Mulleres Rurais Amencer) e Rosa María Feijoo Rebollo (Concelleira de Cultura de Toén), axentes principais na labor de recuperación destas máscaras.
