Ordes, 3 de xullo do 2019 – O deporte de Ordes non para no verán e ademais de seguir conseguindo medallas prepara a nova tempada buscando novas promesas.
Taekwondo, fútbol, patinaxe o mesmo salvamento; o deporte de Ordes é un dos máis activos da bisbarra. Estes días Antía Calvo do Club de patinaxe Galia conseguía a primeira posición alevín na Copa Federación disputada en Santiago. No XIV Campionato de España de Salvamento e Socorrismo, e tamén na categoría alevín, Xiana López Fernández facíase co primeiro posto na proba de Carreira con Táboa de Rescate (Nipper).
Pero ademais de estes éxitos os equipos de Ordes preparan a nova tempada con intención de crecer. A SDC Ordes celebrou onte unha reunión aberta na que explicou a intención de abordar a creación de dous equipos femininos de cara á próxima tempada. Tal e como explican dende a directiva o fin principal desta iniciativa é “colaborar co crecemento deste deporte entre as rapazas da nosa contorna. Como todos os comezos este tamén será complicado, por iso solicitamos a colaboración tanto das rapazas que teñan interese nesta iniciativa como das súas familias e amizades”.
