Vedra, 21/05/2026 – 15 anos de Goza do Ulla e un crecemento do que sentirse orgullosos pasando de 5 concellos, na primeira edición, aos 20 que participan na actualidade.
Desde o nacemento do río en Antas do Ulla o programa de sendeirismo percorre 130 quilómetros ata a desembocadura na ría de Arousa. Concellos das provincias de A Coruña, Lugo e Pontevedra: Antas de Ulla, Monterroso, Palas de Rei, Santiso, Agolada, Arzúa, Vila de Cruces, Touro, Boqueixón, Silleda, A Estrada, Vedra, Teo, Padrón, Pontecesures, Dodro, Valga, Catoira, Rianxo e Vilagarcía de Arousa.
Un espazo protexido pola Rede Natura 2000 e un proxecto que triunfou grazas á xestión compartida en canto a organización, financiamento e aproveitamento dos recursos materiais e humanos aportados por cada Concello.
Na actualidade os integrante do Goza do Ulla traballan para constituír unha asociación de concellos. Ao mesmo tempo hai que seguir redescubrindo non só as rutas de sendeirismo senón tamén as potencialidades que ofrecen os territorios e paisaxes vertebradas polo Ulla.
Actividades como o cicloturismo, a pesca e as actividades acuáticas en xeral intentaranse promocionar de forma conxunta, preservando a contorna a partir do seu coñecemento e desenvolvemento sostible.
O Programa Goza do Ulla 2026, acolle un total de 19 rutas que percorrerán os 20 concellos bañados polo Ulla, unha delas é compartida entre 2 concellos. As rutas comezarán o 30 de maio en Boqueixón, e rematarán o 24 de outubro en Santiso.
O programa Goza do Ulla é unha iniciativa de dinamización turística, cultural e económica arredor do río Ulla, que promove os recursos naturais, patrimoniais e gastronómicos dos concellos da súa contorna. Busca conectar territorio, identidade local e desenvolvemento sostible mediante actividades, rutas, eventos e colaboración entre entidades .
O seu potencial está en converter o Ulla nun eixo de atracción turística de referencia en Galicia, xerando oportunidades para o comercio local, o turismo activo e a valorización do patrimonio. Ademais, favorece a cooperación intermunicipal e contribúe a fixar poboación e crear actividade económica no rural.
