Boqueixón, 4 de marzo do 2021 – O Concello de Boqueixón vén de poñer en marcha unha web de venda online para o comercio local que accederá de balde ao seu uso.
O concello busca novas vías de negocio para o pequeno comercio en internet. O alcalde, Manuel Fernánde Munin, explicaba que “a crise sanitaria propiciou un cambio moi grande nos hábitos de consumo e na adquisición de produtos, implantándose cada vez máis o comercio electrónico. É por iso que dende o Concello queremos axudar ao noso empresariado a poñer á disposición da clientela os seus produtos a través dunha mesma plataforma”
Reunión informativa
Para informar sobre esta nova proposta, o concello organiza unha reunión explicativa que terá lugar o vindeiro 15 de marzo ás 20.00 horas na Casa da Cultura de Camporrapado. Para asistir, cómpre formalizar inscrición previa a través do enderezo electrónico emprego@boqueixon.com.
Dadas as restricións sanitarias actuais, o aforo estará limitado. Tomaranse todas as medidas de seguridade e prevención necesarias contra a expansión da COVID-19.
Dende o Concello de Boqueixón animan ao empresariado local a sumarse a esta iniciativa. Ao tempo, lembran que nin o acceso á plataforma nin á venda terán ningún tipo de custo ou comisión.
