Compostela, 04/03/2026 – Os Encontros Americanos na Granell teñen como fin ofrecer un espazo aberto de diálogo, ideas, debate e reflexión arredor de América. Un programa de conferencias mensuais que abordan temas culturais, políticos, sociais, económicos ou de actualidade, de interese público e carácter divulgativo.
A cita de este mércores día 5, a partir das sete da tarde, terá como conferenciantes a María Esther Velásquez, Maygra Isabel Guevara e Mónica Cea. O título “Mulleres Bravas: defendendo o común en Galicia e Honduras”.
María Esther Velásquez (Namasigüe, Honduras) na súa traxectoria combina compromiso social e defensa ambiental: participa en redes de mulleres que loitan contra a violencia de xénero e forma parte de plataformas que resisten fronte ás industrias extractivas conseguindo que o seu municipio se declarase libre de minería e megaparques de enerxías renovábeis.
Maygra Isabel Guevara Cruz dende moi nova implicouse na defensa comunitaria das zonas de pesca de Namasigüe, evitando que intereses empresariais se apoderasen das lagoas e canais tradicionais. Hoxe impulsa accións de conservación e xestión sostíbel a través da Asociación de Pescadores.
Desde A Ulloa, Mónica Cea, suma a súa voz desde o rural fronte ao macroproxecto industrial de Altri na defensa do territorio e da vida digna.
Mulleres Bravas é un proxecto conxunto de Amigas da Terra e Enxeñería sen Fronteiras como punto de encontro entre activistas de Honduras e Galicia. O proxecto aposta por tecer redes de solidariedade, recoñecendo o papel das mulleres como defensoras do territorio.
Nas conversas fálase de modelo produtivo, de sostibilidade e de igualdade, entendendo que a defensa ambiental é tamén unha cuestión de xustiza social. As experiencias do Sur Global e do rural galego dialogan. Mulleres Bravas non é só un proxecto: é un tecido vivo de voces, afectos e aprendizaxes compartidas.
Os Encontros teñen lugar na Fundación Eugenio Granell, organizados polo Grupo de Historia de América (HistAmérica) da USC, e cofinanciados pola Vicerreitoría de Estudantes e Cultura a través da súa convocatoria de axudas de dinamización cultural.
Os seus participantes son especialistas procedentes do ámbito académico americano, español ou europeo, así como profesionais vencellados á realidade da rexión nas súas múltiples facetas
