Nova excavación no Castelo de Portomeiro en Val do Dubra

Val do Dubra, 5/05/2026 –  O proxecto científico “Castelos no aire” comezou onte unha nova campaña de escavación arqueolóxica no Castelo de Portomeiro (Val do Dubra). Os traballos céntranse na ampliación das áreas xa estudadas e na identificación de novas estruturas do xacemento altomedieval.

A intervención insírese no proxecto “Estratexias de Control Territorial en la Gallaecia Altomedieval (ConTroGAL)” que dirixe o investigador Mario Pereiro Fernández (SÍNCRISIS-CISPAC-USC) así como en “Escenarios de negociación y conflito en espazos de xestión comunal” (PID2024-155273NB-C43) que coordinan a investigadora Margarita Fernández Mier, da Universidade de Oviedo, e o investigador José Carlos Sánchez Pardo, de CISPAC-USC, e conta co apoio económico do grupo de investigación Aevum da USC.

Estes expertos dirixen a campaña de Portomeiro, que contará cun equipo interdisciplinar de arqueoloxía e persoal especializado en traballo de campo e ademais, como novidade, participarán tamén sete estudantes de mestrado de Arqueoloxía e do grao de Historia da Universidade de Santiago, reforzando a dimensión formativa da intervención.

O traballo centrarase no sector central do xacemento, coa ampliación da escavación no denominado Edificio 1. O obxectivo é completar a exhumación das estruturas xa identificadas en campañas anteriores e avanzar na definición da súa planta e da súa relación co resto do complexo arquitectónico. Tamén será importante o estudo da cerámica do período altomedieval que este xacemento está a achegar.

Para Mario Pereiro, esta nova campaña permitirá afondar no coñecemento da organización deste “excepcional asentamento, cunha primeira fase de época castrexa e unha segunda etapa como fortificación da alta idade media, un período para o que aínda hai poucos xacementos suficientemente ben coñecidos e escavados en Galicia”.