Negreira_Ames, 05/07/2026 – Un ano máis os concellos de Negreira e Ames organizan unha das noites máis bonitas do ano na Ponte Maceira. As “Noites en Vela” convidan a sair e desfrutar na noite dun dos paraxes máis fermosos da bisbarra.
Os alcaldes de Negreira, Manuel Ángel Leis, e o de Ames, Blas García, presentaron esta edición das “Noites en Vela” no mesmo espazo no que se celebrarán. Leis destacou que “este é un evento importante para os dous Concellos. Conseguimos promover a nosa cultura musical, tradición, o Camiño a Fisterra – Muxía, e un lugar emblemático como é A Ponte Maceira, ben de interese cultural e un dos pobos máis bonitos de España”.
Pola súa banda Blas García indica que “as Noites en Vela xa é unha festa consagrada, que se celebra nun paraxe tan bonito como é A Ponte Maceira. É importante porque potenciamos a música tradicional. Por aquí pasaron Tanxugueiras ou Xabier Díaz, que acabaron sendo grupos moi importantes da música galega. Deste xeito seguimos apostando por grupo novos e emerxentes e grupos locais e da contorna”.
AS “Noites en Vela” 2026 comezaron a celebrarse no 2016 e só a pandemia obrigou a cancelalas, Este ano a cita será o 18 de xullo as 21:00 horas. Os grupos encargados de amenizar a noite serán o cuarteto Balteira e mailo grupo de gaitas amesán da Asociación Cultural Follas Novas.
Haberá tamén un espectáculo pirotécnico que poñerá o punto final á velada. O acceso ao evento é de balde. A actuación de Balteira está subvencionada pola Xunta de Galicia dentro do programa Cultura no Camiño 2026. Haberá un servizo de autobús gratuíto que percorrerá O Milladoiro, Bugallido, Agro do Muíño e Bertamiráns.
Balteira
Balteira nace a finais do 2025 en Betanzos da man de Cris Sánchez e Noa Migal (voces e percusións), Álex Fente (acordeón) e Pablo Pacior (ventos). A súa proposta céntrase na recuperación do repertorio oral galego, incorporando arranxos contemporáneos pero respectando a estrutura e a emoción das pezas tradicionais.
Os cantares que sempre encheron de festa os torreiros e as melodías instrumentais para o baile, son o eixo sobre o que xiran os seus concertos, mantendo o espírito da foliada desde a calidade técnica e interpretativa destes catro grandes da nosa música tradicional. Entre as gravacións xa editadas, destacan o Maneo de Anxeriz, con arranxo de Pedro Lamas, e a Muiñeira de Bardaos.
Os seus integrantes proceden de proxectos tan recoñecidos como Tiruleque, Xose Lois Romero & Aliboria, Comando Curuxás ou Habelas Hainas, e contan cunha grande bagaxe como intérpretes e docentes de música tradicional en diferentes asociacións e escolas de todo o país.
O nome da agrupación fai referencia á soldadeira medieval María Pérez “A Balteira”, figura histórica vinculada á liberdade e á transgresión social; fonte de inspiración e símbolo do carácter renovador do proxecto. Balteira é a forza da renovación na tradición galega.
Grupo de gaitas da AC Follas Novas
Por outra banda, o grupo de gaitas da Asociación Cultural Follas Novas está formado por socios/as e alumnos/as da asociación para difundir a música galega e colaborar animando as festas dos veciños en diferentes eventos (festas, actividades culturais…). Desta volta, participarán nas Noites en Vela interpretando varios temas de música tradicional galega.
Servizo de autobús gratuíto
O Concello de Ames habilita un servizo de autobús gratuíto que percorrerá O Milladoiro, Bugallido, Agro do Muíño e Bertamiráns. Deste xeito, preténdese facilitar á asistencia ao evento, así como evitar a masificación de vehículos particulares en A Ponte Maceira, lugar declarado ben de interese cultural (BIC).
A hora de saída do autobús será ás 20.00 horas desde O Milladoiro, e realizará paradas nas localidades mencionadas anteriormente, ata chegar A Ponte Maceira. O regreso farase unha vez remate a velada. As persoas interesadas en empregar este servizo deberán enviar un correo ao enderezo electrónico gabinete@ames.gal indicando nome, apelidos e un teléfono de contacto, ou chamar ao número 881 074 730.
