Noia, 04/03/2026 – Os albergues son sempre usado por peregrinos pero cada vez máis son tamén aloxamento para outro tipo de perfis. O concello de Noia ven de anunciar un importante investimento no da Chaiza.
Noia ven de sacar a licitación por 44.000 euros a dotación de subministros, unha actuación fundamental para permitir a apertura definitiva do albergue da Chaiza. O fibnanciamento procede dos fondos europeos, o que permitirá dotar a instalación dos servizos básicos necesarios para o seu funcionamento.
A actuación contempla a instalación dos subministros de electricidade, auga e saneamento, dos que carecía o que na práctica impedía a súa posta en marcha e uso efectivo. Grazas a esta inversión, o albergue poderá estar plenamente operativo previsiblemente para a próxima Semana Santa.
O alcalde de Noia, Francisco Pérez, e o tenente de alcalde, Manolo Seijas, visitaron recentemente as instalacións para coñecer de primeira man o estado actual e supervisar os avances realizados.
Durante a visita, o rexedor destacou a importancia desta actuación sinalando que “esperamos que isto teña unha dimensión turística importante, que permita atraer visitantes e consolidar a nosa oferta de aloxamento, especialmente en períodos de alta demanda como a Semana Santa”.
O Goberno local considera que a posta en funcionamento do albergue da Chaíza suporá un importante impulso para o sector turístico local, contribuíndo á dinamización económica e á promoción de Noia como destino atractivo tanto para peregrinos como para visitantes que escollen a vila para gozar do seu patrimonio, gastronomía e contorna natural.
O Concello destaca ademais o papel clave dos fondos europeos para facer realidade esta infraestrutura, que permitirá poñer en valor un espazo que ata o de agora non podía desenvolver todo o seu potencial e ampliar os servizos dispoñibles no municipio.
