Noia, 06/06/2026 – O concello de Noia ven de investir 90.000 euros os traballos de remodelación dos xardíns de Felipe Castro. O financiamento chegou a través de fondos europeos e as obras tiveron unha duración aproximada dun mes e centráronse fundamentalmente na renovación das infraestruturas existentes.
Entre as actuacións realizadas polo concello de Noia destacan a reparación da rede de saneamento, a recuperación da subministración eléctrica, que se atopaba interrompida, a mellora da corrente de auga e a posta ao día de distintos servizos básicos que presentaban importantes deficiencias.
Aínda que a obra estaba inicialmente prevista para rematar o pasado 27 de marzo, o Goberno municipal decidiu non recepcionala ao comprobar que o pavimento instalado pola empresa adxudicataria non se correspondía co contemplado no proxecto aprobado nin cos requirimentos establecidos por Patrimonio. Ante esta situación, o Concello esixiu a retirada do acabado executado e a colocación do previsto inicialmente.
Hai dúas semanas reiniciáronse os traballos para executar o pavimento correcto, quedando agora rematada definitivamente unha actuación que o Concello de Noia considera prioritaria tanto pola súa localización como polo valor patrimonial da contorna.
O alcalde de Noia, Fran Pérez, destacou que “as conversas coa empresa comezaron no mesmo momento no que rematou a obra e comprobamos que o acabado non era o que figuraba no proxecto. É certo que isto supuxo unhas semanas máis de espera, pero non lle damos maior importancia”.
Pérez subliñou ademais que “o importante é que hoxe Noia conta cun espazo renovado, cun acabado acorde ao valor patrimonial da contorna e que responde ao que se proxectara desde o principio”.
Pola súa banda, o Goberno municipal realiza unha valoración moi positiva do resultado final da actuación, que considera plenamente integrada na Alameda e en harmonía coa estética e os materiais empregados noutras intervencións recentes da zona, como a realizada no Campo da Feira.
Coa reapertura dos Xardíns de Felipe de Castro, o Concello dá por concluída unha actuación que permitiu recuperar e mellorar un dos espazos públicos máis representativos do municipio, garantindo ao mesmo tempo o respecto polos criterios patrimoniais e a correcta execución dos fondos investidos.
