Bisbarra, 13 de marzo do 2023 – A Confraría de Noia impulsa unha Plataforma comarcal de afectados pola explotación da mina de San Finx.
A Plataforma nace despois da manifestación multitudinaria en contra do vertido de augas residuais autorizado por Augas de Galicia. Unha autorización que anticipa o permiso de explotación do complexo mineiro.
A esta Plataforma poderanse unir “todo tipo de colectivos, entidade, asociacións, empresas, clubs, partidos políticos… que entendan podan ser afectados directa ou indirectamente. O obxectivo, explican, será defender os seus intereses “ata as últimas consecuencias”.
A Confraría de Noia fai un chamamento “á cordura da conselleira de Infraestruturas e Mobilidade, Ethel Vázquez, para que paralice a executividade da autorización”, o que solicitou xa como medida cautelar urxente nada máis ter coñecemento da autorización.
As solicitudes de adhesión poderanse enviar ao correo electrónico da Confraría, cofradia@cofradianoia.org . Ao mesmo tempo manteranse reunións con distintos colectivos para que se sumen á iniciativa.
Impacto inminente
A Conraría lembra que de non suspenderse a autorización do vertido, que a empresa australiana pretende bombear desde as plantas inundadas da mina, “causará un enorme dano ambiental e prexuízo económico ao sector do mar, pois a ría de Muros e Noia está tan só sete quilómetros por debaixo da mina”.
Engaden que o baleirado das plantas inundadas, que require un bombeo e vertido constante de grandes proporcións, que incluso duplicaría o caudal do río durante a maior parte do ano, non soluciona nada nin posibilita a actividade mineira se esta carece, como ata o de agora, das preceptivas autorizacións ambientais.
Ademais, o baleirado das plantas inundadas non é unha acción puntual, se non que implica un bombeo e vertido continuado que, de pararse, levaría ao punto de partida, isto é, a reinundación da mina, só conseguindo poñer en risco sen ningún propósito toda a actividade de marisqueo na ría.
