Bisbarra, 8 de xuño do 2023 – O concello de Noia ten unha das distribucións de concelleiros máis complexas de toda a bisbarra con 5 partidos distintos influíndo nas posibilidade de goberno.
Se o gañador real é o Partido Popular o moral son os Noieses Independentes agrupados, NO.I.A. que se colocan como terceira forza política do concello. Un crecemento que chega despois de catro de coalición co PP e que os coloca no centro das negociacións para formar goberno en Noia, sen que desde o partido se descarte nada.
Noia pendente de NO.I.A.
O concello de Noia non viviu unha substancial diferenza en canto ao reparto de concelleiros. O único cambio foi o que perdeu o Psoe en favor do BNG. O PP mantén 7, o Psoe queda en catro, NO.I.A. 2, Marea Cidadá 2 e o BNG crece e pasa de 1 a 2.
Esta distribución sen embargo permite múltiples combinacións. Desde unha coalición PP e NO.I.A. como ha vivida os últimos catro anos ata un goberno en minoría de esquerdas con apoios puntuais ou mesmo unha coalición de catro partidos de esquerdas. Todo un sudoku electoral.
É no número de votos no que hai diferencias que son reivindicadas por José Pérez, concelleiro de NO.I.A. e responsable de cultura durante esta lexislatura, que en declaracións a Lindeiros lembra que se converteron na terceira forza política.
Pérez considera que a subida en votos do PP e o BNG son consecuencia dos “ventos favorables que se viron en todas partes cara estes partidos” NO.I.A., explica “subiu en 163 votos e quedouse a 68 dun concelleiro máis que perdería o Psoe”. José Pérez lembra ademais que “son catro lexislaturas mantendo 2 concelleiros e subindo en votos en cada ocasión, no 2019 un 12% e en estas un 17%; tendo en conta ademais que hai menos censo e que, no noso caso, non se vota en clave de nada”.
Polo momento xa mantiveron conversas co Partido Popular, Partido Socialista e Marea Cidadá para ver con que actitude se presentan e continuarán explorando os posicionamentos antes de decidir unha postura de cara á investidura e ao mandato.
