Bisbarra, 6 de marzo do 2023 – Milleiros de persoas achegáronse este pasado sábado a Noia para participar na manifestación en contra da autorización de verteduras da mina de San Finx.
A protesta estaba convocada pola Confraría de Pescadores San Bartolomeu de Noia, xunto á Confraría de Pescadores S. Andrés de Portosín e Mexilloeiros Olvimar. Unha manifestación que tiña como lema xeneral Mina non, Ría Si!.
As máis de 3.000 persoas concentráronse diante da Casa do Concello de Noia para protestar pola autorización para verter á rede fluvial da ría de centos de miles de metros cúbicos de achiques de mina. Estas augas están cargadas con metais pesados como o cadmio, cobre e zinc, procedentes da antiga mina de volframio e estaño de San Finx, en Lousame.
Traballadores do mar, do sector do comercio e da hostaleira (que pechou as súas portas para participar na marcha), da industria conserveira e das depuradoras, asociacións deportivas e culturais xunto a entidades da Ría de Muros-Noia, amosaron estar unidos para reclamar ao goberno galego que de marcha atrás nunha decisión que supón un irreparable dano á biodiversidade e á riqueza da Ría de Muros-Noia.
Tamén estiveron fronte ao Concello membros de colectivos como Adega, Verdegaia ou Ecoloxistas en Acción, e representantes dos partidos políticos así como alcaldes da comarca xunto a organizacións sociais que durante os últimos días fixeron público o seu apoio a esta mobilización.
Liliana Solís, bióloga da Confraría de San Bartolomeu de Noia, tomou a palabra xunto a representantes dos ecoloxistas, e os patróns maiores de Portosín, Isaac Gaciño, e da Confraría de San Bartolomeu de Noia, Santiago Cruz. Todos amosaron a súa repulsa á decisión da Xunta deixando patente que se trata dunha “loita polo futuro da xente do mar e por sectores estratéxicos para a economía local como o comercio e a hostalería, polo futuro da nosa ría, do noso pobo e desta comarca”.
Santiago Cruz dixo que “Desde a nosa Confraría facemos un chamamento á cordura da conselleira de Infraestruturas e Mobilidade, Ethel Vázquez, e ao conxunto do goberno galego, para que se paralice a autorización. A Xunta debe resolver de inmediato o recurso e a solicitude de medidas cautelares, e por suposto continuaremos o proceso xudicial. De feito, xa se presentaron tres querelas contra os técnicos da Xunta”.
Na mobilización avanzouse tamén que haberá novas protestas en Santiago fronte á Xunta e en outros puntos da comarca. “Temos a verdade por diante”, insistiu Santiago Cruz que engadiu que se a administración non rectifica recorrerase cun proceso Contencioso Administrativo “para intentar parar isto. Ogallá rectifique porque somos mariñeiros e o que nos gusta é traballar”, aseverou o patrón maior.
