Noia, 30/03/2026 – O Goberno municipal de Noia vén de sacar adiante a licitación do Servizo de Atención no Fogar (SAF), aprobada na sesión plenaria celebrada o xoves 26 de maio, cun orzamento de 1,8 millóns de euros. O contrato terá unha duración dun ano, prorrogable por un ano máis.
O tenente de alcalde, Manolo Seijas, explicou que este proceso chega tras un período de sete meses de traballo desde a entrada do actual goberno municipal. Neste sentido, lembrou que cando accederon ao executivo no mes de agosto, o contrato atopábase xa caducado.
“Fixemos todo o posible para que haxa un bo prego”, sinalou Seijas, quen tamén destacou que o Concello cumpriu co compromiso adquirido coas traballadoras do servizo, garantindo estabilidade e continuidade.
Pola súa banda, a concelleira Sandra González anunciou que durante este ano incrementarase o SAF en 1.800 horas adicionais, o que permitirá atender a máis persoas en situación de dependencia.
González puxo en valor que se trata dun servizo esencial e necesario para a cidadanía, especialmente para as persoas máis vulnerables, e reafirmou o compromiso do goberno local coa súa mellora continua. Ademais, avanzou que antes de que remate o mandato se realizará un estudo para avaliar a posible municipalización do servizo. “É o noso compromiso”, concluíu.
