Un dos festivais máis interesantes da bisbarra e o Noia Harp Fest. Un Festival de Arpa que ven de anunciar as datas da edición 2026, do 29 de xullo ao 1 de agosto. Trátase do único festival de estas características do noroeste peninsular.
Cunha ducia de edicións ás costas, polos seus escenarios pasaron algunhas das mellores arpistas das últimas décadas, como tamén as xeracións máis novas das escolas de Galicia.
O Noia Harp Fest está dirixido artisticamente pola asociación do mesmo nome. Un colectivo formado polos principais arpistas do país. Desde o 2023 incorpora ademais o Premio Internacional de Composición Portus Apostoli, un certame creado para favorecer a ampliación do repertorio de obras escritas para arpa e orquestra.
Nas últimas edicións, as pezas gañadoras (creacións dos arxentinos Federico Beilinson e Alejandro Civilotti) foron interpretadas pola Real Filharmonía de Galicia. Precisamente estas semanas o xurado está a valorar as obras enviadas no marco da cuarta edición do concurso e o fallo darase a coñecer proximamente.
A 13ª edición do Festival Internacional de Arpa Vila de Noia está organizada por Nalgures Producións, baixo a dirección da asociación Noia Harp Fest, e conta co apoio institucional do Concello de Noia, Xunta de Galicia a través da Axencia Turismo de Galicia, e de Acción Cultural Española AC/E, ademais da colaboración da Deputación da Coruña.
