Noia, 1 de xunho do 2022 – O Tribunal Superior ven de confirmar a sentenza que condena a dez meses de cárcere a catro Garda Civís por abusos a un compañeiro cando prestaban servizo en Noia.
Os feitos producíronse entre os anos 2010 e 2014. Segundo os feitos probados os catro Gardas Civís acosaron durante ese tempo ao denunciante con expresións como “maricón” “Maripili” ou “fresita”. Os condenados chegaron a utilizar expresións como “Arriba españa y muerte a los maricones” ou “prefiero tener un hijo muerto o drogadicto que maricón”.
A sentencia foi confirmada pola Sala V de lo Militar do Tribunal Supremo e ratifica a emitida polo Tribunal Militar Territorial Cuarto, con sede na Coruña. A decisión considera tamén ao Estado responsable civil subsidiario e o condena ao pago dunha indemnización de 10.000 euros por danos psíquicos e morais.
O BNG de Noia quere que se condene desde o concello
Os nacionalistas solicitaron xa o tratamento deste tema de forma urxente na comisión municipal de Igualdade, onde o grupos acordaron dar lectura a unha declaración conxunta da Corporación unha vez a condena fose ratificada polo Supremo.
Logo de ser coñecida dita ratificación, o BNG instará ao cumprimento do acordo da Comisión de Igualdade do municipio co obxecto de realizar unha declaración conxunta da Corporación en condena do acontecido.
Desde o BNG sinalan que estes abusos no seo da Garda Civil de Noia entre 2010 e 2014 recollidos nun proceso xudicial que remata oito anos despois deberían facernos reflexionar sobre o moito que se precisa mellorar en materia de Igualdade.
Do mesmo modo, cualifican de espantoso que este tipo de conductas discriminatorias estean normalizadas en determinados círculos da nosa sociedade, ao tempo que subliñan como especialmente preocupante que acontezan nunhas forzas de Seguridade cuxa función é a de velar pola seguridade cidadá.
Ademais, os nacionalistas entenden que é inadmisible que procesos xudiciais coma este non sexan resoltos de forma máis rápida, tendo a vítima que agardar por oito anos á sentenza firme mentres sofre consecuencias psíquicas graves e ve a súa carreira profesional truncada.
