Bisbarra, 30 de maio do 2024 – A Cámara de Comercio de Santiago, xunto co Concello de Noia e a Asociación Noia Histórica traballan na posta en marcha dunha comunidade enerxética empresarial.
O obxectivo da comunidade enerxética e beneficiar aos autónomos e pemes do concello, axudándolles a impulsar un desenvolvemento sostible e mellorando a súa competitividade.
A Secretaria Xeral da Cámara, Rosa Mary Cardeso, o anunciou na xornada informativa ás empresas noiesas que tivo lugar no Edificio do Casino da vila. Cardeso destacou que a creación dunha Comunidade Enerxética Empresarial é “un modelo testado técnica e xuridicamente noutras Comunidades Autónomas, que ten sido catalogado como proxecto piloto nacional polo IDAE”.
A comunidade enerxética en estas comunidades está permitindo a autónomos, microempresas, pemes e empresas, e mesmo aos Concellos, aforros considerables na súa factura eléctrica, con enerxías 100% renovables, e empregando un vehículo que lles axudará a evolucionar no novo modelo de transición enerxética”
O acto contou coa participación do Alcalde de Noia, Santiago Freire, quen agradeceu a iniciativa e amosou a vontade de colaboración e a “necesidade de promover unha economía sostible e equilibrada co medio ambiente, nos termos recollidos na Axenda 2030 e, neste sentido, as comunidades enerxéticas son un vehículo eficaz para a transición enerxética”.
De igual xeito, Javier Zuazola, responsable de desenvolvemento das Comunidades Enerxéticas Empresariais de EDINOOR, filial 100% de Repsol, e socio tecnolóxico do proxecto, salientou a importancia medioambiental, social e económica da posta en marcha destas comunidades e o papel que as Cámaras de Comercio están a xogar no desenvolvemento económico sostible da súa demarcación..
Segundo o estudo realizado a raíz das cubertas municipais facilitadas polo Concello, poderían xerarse no municipio máis de 300 KW de potencia. Esta produción de enerxía solar supoñería un aforro de 2.198 toneladas de emisións de CO2 á atmosfera, o que equivalente a plantar case 3.000 árbores, que estarían a absorber o dióxido de carbono da atmosfera durante 25 anos.
Máis aló dos beneficios medioambientais, as empresas que se adhiran á Comunidade Enerxética, poderán beneficiarse, mediante a colocación de instalacións fotovoltaicas en réxime de autoconsumo compartido, dun aforro dos seus custos enerxéticos nunha porcentaxe aproximada dun 25%, e dunha compra mancomunada de enerxía 100% renovable para o 75% restante, o que lle permitirá optimizar dun xeito considerable a súa factura. Cuestión non baladí, se temos en conta que moitas das empresas ubicadas no Polígono de Augalevada son electrointensivas.
