Bisbarra, 14 de abril do 2023 – Preocupación na confraría de Noia ante comezo dos traballos para a construción dun planta de tratamento de achiques na mina de San Finx.
Ecoloxistas en acción verificaron o comezo de estas obras en San Finx por parte da filial australiana Pivotal Metals. Estes traballos, segundo ecoloxistas e mariñeiros, son o paso previo antes do baleirado das vellas galerías.
Para os colectivos denunciantes trátase dunha actuación fora da lei xa que a actividade non foi sometida á avaliación de impacto ambiental e o proxecto non prevía ningún tipo de tratamento para a auga contaminada con metais pesados.
Lembran ademais que están sen resolver os recursos de alzada presentados contra a autorización de vertidos e pola que xa foron incoadas dilixencias penais nos Xulgados de Santiago contra os funcionarios e altos cargos responsables.
Desde a Confraría tamén se avanza que se presentarán de forma inminente demandas ante o Tribunal Superior de Xustiza, unha vez que se cumpra o prazo de 3 meses do que dispón a Consellaría de Infraestruturas para resolver os recursos.
Pos estas cuestións ecoloxistas e mariscadores consideran que “é unha neglixencia por parte da Xunta non deter calquera tipo de actividade na mina”. Ao tempo lembran que a Plataforma Comarcal contra os vertidos da Mina de San Finx acordou manifestarse en Santiago o vindeiro sábado 29 de abril ás 12:00 horas para continuar a amosar unha firme oposición á autorización de vertidos de augas residuais procedentes da mina.
O pósito noiés considera ademais que co inicio desta obra “fai aínda máis importante que se reclame xa á Xunta que de marcha atrás na autorización do vertido á rede fluvial da ría de centos de miles de metros cúbicos de achiques de mina, cargados con metais pesados como o cadmio, cobre e zinc, procedentes da antiga mina de volframio e estaño de San Finx, en Lousame”.
