O Concello de Noia ven de presentar a programación oficial da XL edición do Entroido de Noia, que este ano chega baixo o lema “É Entroido en Noia”. Unha cita que amplía a programación cun calendario de actividades que aposta por propostas para todos os públicos.
O concelleiro de Eventos, Abel Pan, mostrouse moi satisfeito co programa deseñado para esta edición tan especial, destacando que “é un Entroido que mantén a esencia de sempre, pero que ao mesmo tempo medra e se diversifica, con máis actividades e máis días de festa”.
Pan puxo especialmente en valor a recuperación dun dos actos máis emblemáticos: “Recuperamos o Paris Dakar tradicional o primeiro venres, o 13 de febreiro, unha cita moi querida pola veciñanza e que forma parte da historia do Entroido de Noia”.
Pola súa banda, o tenente de alcalde, Manolo Seijas, subliñou que un dos grandes obxectivos desta edición é potenciar a xornada do sábado: “Queremos que o sábado 14 Noia se converta nun auténtico campo de festa, con distintas discotecas móbiles repartidas pola vila e cun prato estrela como será o evento “Noia con marcha: A Noia dos 90-00”, no que faremos unha viaxe ao pasado, á Noia de hai 30 anos, animando a participar con disfraces acordes a esa temática”.
O Entroido arrancará o venres 13 coa celebración do Paris Dakar de sempre, que sairá ás 21:00 horas dende o Bar París, con inscrición previa a través de WhatsApp no 626 77 12 19, e que finalizará na Carpa da Alameda, onde haberá animación musical.
A programación continuará o sábado 14 cun tardeo dende as 17:00 horas na Carpa da Alameda, amenizado pola Cabina Móvil, e pola noite celebrarase o gran evento “Noia con marcha” ás 23:30 horas, no que se sorteará tamén unha moto entre as persoas asistentes.
O domingo 15 será a quenda do Bingo de Entroido, que terá lugar ás 20:30 horas na Carpa da Alameda, conducido por Patricia Galán, con música e animación durante toda a sesión.
O luns 16 estará especialmente pensado para o público máis novo, cunha festa infantil con inchables e espectáculo de Animart ás 17:00 horas na Carpa da Alameda, ademais do correspondente desfile infantil de disfraces.
O Entroido de Noia despedirase provisionalmente o mércores de cinza co tradicional Enterro da Sardiña, que contará coa Charanga Solfamidas e unha chocolatada ás 19:00 horas na Carpa da Alameda, para dar paso ao inicio do enterro ás 20:30 horas.
Finalmente, o venres 20 celebrarase o Gran Desfile de Entroido, o Paris Dakar habitual, que sairá ás 20:30 horas dende o Paseo Marítimo ata o Curro, onde estará instalada a disco móbil CDC para poñer o broche final á festa.
Os premios deste desfile ascenderán ata os 7.600 euros. Dende o Concello de Noia destacan que esta XL edición do Entroido supón “un paso máis na aposta por unha das festas máis importantes do calendario local”, animando tanto á veciñanza como ás persoas visitantes a participar activamente nun programa que combina tradición, música, disfraces e moita festa.
