Imaxe Federación Española de Remo
O Casino de Noia foi o escenario da presentación do Campionato Xunta de Galicia de Ergómetro, que se celebrará este domingo no Pavillón Municipal Agustín Mourís.
A participación será de récord xa que supera os 1.100 deportistas inscritos. A concelleira de Deportes salientou o importante crecemento do evento, sinalando que “o número de participantes supón un récord histórico, duplicando as cifras de anteriores convocatorias e consolidando a Noia como unha referencia dentro do calendario deportivo galego”.
Tamén destacou o valor social do ergómetro como “un deporte accesible e integrador, capaz de reunir persoas de condicións moi diversas e promover a participación a través do deporte”.
No acto estivo tamén presente, ademais da concelleira, Chus Blanco, representante da organización, que destacou a relevancia desta cita deportiva tanto polo seu nivel competitivo como polo seu carácter accesible e inclusivo.
Desde o Concello de Noia convidouse á veciñanza a asistir e desfrutar da xornada, reafirmando ademais o apoio institucional ao Club de Remo Noia polo seu traballo na promoción do deporte e na organización de eventos de relevancia autonómica.
Pola súa banda, Chus Blanco destacou o alto nivel deportivo da competición, indicando que “o campionato contará coa participación de deportistas olímpicos, tanto en activo como históricos, así como coa presenza da práctica totalidade dos clubs de remo de Galicia, convertendo esta cita nun referente dentro do calendario autonómico”.
O Campionato Xunta de Galicia de Ergómetro reunirá este domingo a centos de deportistas e afeccionados nunha xornada que combinará competición, convivencia e promoción de valores como o esforzo, a inclusión e o traballo en equipo.
