Melide, 10/07/2026 – O concello de Melide acolleu a presentación da campaña “No caminas sola” coa presencia da secretaria de Estado de Seguridad, Aina Calvo, e o Delegado do Goberno en Galicia, Pedro Blanco.
Trátase da sexta edición de “No caminas sola” e esta destinada, como nos anos anteriores, a protexer a peregrinación de centos de miles de mulleres “con liberdade, con autonomía e sen medo” en palabras de Aia Calvo.
A iniciativa combina o despregamento dos axentes da Policía Nacional e a Garda Civil nos distintos itinerarios do Camiño de Santiago e un esforzo coordinado de sensibilización cidadá.
Durante a campaña repartiranse en Galicia 41.500 cartóns informativos e 1.700 carteis con datos básicos sobre recursos de emerxencia, teléfonos de asistencia e outros servizos especializados a disposición das usuarias. Estarán dispoñibles en albergues, centros de saúde, farmacias, oficinas de turismo e dependencias policiais.
Calvo engadiu que “Esta campaña representa moito máis que un dispositivo de prevención, é a expresión dun compromiso colectivo cun principio irrenunciable: o dereito de todas as mulleres a vivir e a transitar calquera espazo sen medo”.
A secretaria de Estado de Seguridade destacou o Camiño de Santiago como “un símbolo de encontro, convivencia e hospitalidade, onde a seguridade e o respecto son referentes. Queremos que siga séndoo e que cada persoa que chegue a Galicia atope, non só un destino extraordinario, senón unha terra comprometida coa protección dos seus dereitos”.
“No caminas sola” naceu en 2021 para previr calquera tipo de violencia contra as peregrinas, especialmente sobre aquelas que viaxan en solitario. Na iniciativa participan as Forzas e Corpos de Seguridade do Estado e as unidades contra a Violencia sobre a Muller das Delegacións do Goberno en Galicia, Aragón, A Rioxa, Navarra, Castela e León) e Estremadura.
O ano pasado 280.000 mulleres realizaron o Camiño de Santiago por algunha das rutas xacobeas (un 53 por cento do total de viaxeiros rexistrados), mentres este ano a cifra supera xa as 136.000.
Os materiais distribuídos polo percorrido ofrecen información sobre os servizos de emerxencias e os contactos con Forzas e Corpos de Seguridade do Estado, así como un código QR para a descarga da aplicación móbil AlertCops, que permite denunciar calquera incidencia e compartir a localización exacta do usuario en tempo real mediante GPS.
Garda Civil despregou un ano máis as chamadas Oficinas Móbiles de Atención ao Peregrino (OMAP), que se integran na súa campaña especial de seguridade “Gardiáns do Camiño”. Pola súa banda, a Policía Nacional centra a súa actuación nas cidades e na atención aos peregrinos dentro da súa demarcación, especialmente en Santiago de Compostela.
