Bisbarra, 5 de abril do 2024 – A asociación Negreira Viva coa colaboración do Concello de Negreira promove por segundo ano consecutivo, a súa Feira de Abril.
A cita na praza do concello de Negreira será o vindeiro día 20 a partir das seis da tarde. Haberá actuacións musicais, rebuxito, picoteo, baile e diversión garantida, segundo contan desde a asociación organizadora.
Trala apertura da caseta, ás 19.00 horas terá lugar a actuación de Elisabeth Peñalver, con voz e baile. O programa segue ás 20.00 horas con concurso de playbacks para o que as persoas interesadas poden anotarse a través das redes sociais de Negreira Viva e inclúe premios para todos os participantes.
Metidas xa de cheo na noite da Feira de Abril, a partir das nove chegará un dos momentos máis agardados co concerto con Sabor flamenco, con voz, guitarra e caixón. E para rematar a festa non faltará a animación musical a cargo de DJ Baby.
A organización convida a toda a veciñanza e visitantes a achegarse caracterizados para tan importante ocasión festiva en Negreira.
