Bisbarra, 19 de xuño do 2024 – O delegado do Goberno en Galicia, Pedro Blanco, realizou unha visita institucional ao concello de Negreira, ao que puxo como exemplo de compromiso do goberno cos pequenos concellos.
Pedro Blanco estivo acompañado durante a visita polo alcalde de Negreira, Manuel Ángel Leis. Un encontro que serviu ademais para repasaron os investimentos do Goberno no concello, que superan os 1,7 millóns de euros.
Pedro Blanco sinalou que o compromiso do goberno “plásmase na colaboración directa que mantemos con todos e cada un dos concellos galegos e que permite a consecución de fondos para acometer actuacións que melloren a vida dos veciños e veciñas destes municipios”.
No caso de Negreira, explicou o delegado, os cartos do Goberno posibilitaron a substitución e mellora do sistema de alumeado do municipio por outro máis eficiente e sostible. Una actuación que se traduce nun aforro da factura eléctrica duns 125.000 euros anuais, pero tamén nun maior control do sistema, co que se van reducir as avarías e se van identificar mellor aqueles puntos que precisan máis luz.
Nesta liña, lembrou que Negreira tamén se beneficia de actuacións do Goberno financiadas con cargo aos fondos do Plan de Recuperación, como o programa UNICO, co que 850 fogares e negocios que ata o de agora non tiñan internet de alta velocidade van contar con este servizo, ou o Plan de Sustentabilidade Turística en Destino ‘Terras de Santiago’, con 1,3 millóns de euros a repartir entre os dez concellos que integran o GDR Terras de Compostela, entre os que se atopa Negreira.
“Os concellos galegos, en especial os máis pequenos, saben que teñen neste Goberno un aliado para facer os seus proxectos realidade, en parte grazas aos fondos do Plan de Recuperación, con investimentos que chegan a todos e cada un dos 313 concellos galegos”, indicou Pedro Blanco, quen aproveitou para agradecer ao alcalde “o seu traballo para dotar a Negreira de servizos de primeiro nivel que melloran a vida dos seus veciños e veciñas”.
