Eleccións23, 13 de marzo – O grupo socialista de Negreira comeza o camiño cara as eleccións de maio presentando a campaña “Cumprimos con Negreira. Cumprimos contigo”.
O equipo socialista busca poñer en valor o traballo realizado ao longo da lexislatura. Desde o Psoe de Negreira defenden que o mandato municipal demostrou “traballo, boa xestión e cercanía cos veciños”.
Para os socialistas, “cumprimos con Negreira desde o goberno local porque puxemos en marcha a maior parte do programa electoral do ano 2019, pese a que foi un mandato moi complicado pola pandemia”.
Manuel Ángel Leis Míguez, secretario xeral e de novo candidato do PSOE á alcaldía, fala dos logros conseguidos e destaca que se deron “pasos decisivos para o novo PXOM de Negreira e a empresa encargada xa está traballando na súa redacción, a finais de ano teremos o borrador dunha ferramenta fundamental para o futuro do concello”. asegura nas eleccións municipais de maio de 2023.
Segundo Leis, o goberno socialista de Negreira foi unha referencia en políticas sociais nestes catro anos “cun forte incremento das actividades de conciliación, melloras no SAF, medidas para os maiores e iniciativas como a Unidade de Atención Temperá, da que estamos moi orgullosos”.
Engaden como feito a humanización de Negreira “con obras e proxectos como a praza das Brañas para darlle un maior protagonismo ás persoas, reducindo o impacto dos vehículos”. Ao mesmo tempo poñen en valor a relación coa veciñanza “estivemos moi preto dos veciños e veciñas, escoitando as súas demandas e buscando solucións aos seus problemas con seriedade e a maior axilidade posible”.
Coa campaña ‘Cumprimos con Negreira. Cumprimos Contigo’, os socialistas farán ademais un repaso do compromiso do goberno local coas parroquias, con numerosos investimentos e actuacións; a aposta polo turismo, o medio ambiente e a sostenibilidade; a colaboración co comercio e a hostalería local, ou o apoio ao conxunto do tecido asociativo local.
