Bisbarra, 17 de febreiro do 2025 – Controlar a xestión da auga de xeito dixital é o obxectivo do proxecto que Espina e Delfín ven de poñer en marcha en Negreira.
O Ministerio para a Transición Ecolóxica e Reto Demográfico, do Goberno de España ven de conceder a esta empresa 7 millóns de euros para o seu proxecto de dixitalización do ciclo urbano da auga.
Foi a única empresa que conseguiu investimento para Galicia dentro do Plan de Recuperación, Transformación e Resiliencia (PERTE). Negreira é o único concello que se beneficiará na bisbarra de Compostela e, un pouco máis afastado, o de Palas de Rei.
O monto total que a empresa destina a este proxecto chega aos dez millóns de euros. No caso de Negreira servirá para a instalación de 3.080 contadores intelixentes de telelectura, un caudalímetro e un analizador de calidade nun punto de captación.
Tamén se instalarán medidas ara un control de todos os procesos da estación depuradora, un analizador da calidade na estación de augas residuais e a división por sectores da rede de abastecemento de auga con 9 contadores.
Xa de cara ao usuario e ás administracións locais este proxecto permitirá a mellora da ciberseguridade, a aplicación da intelixencia artificial ao control da explotación e calidade da auga, unha plataforma de acceso público de información e unha serie de plans directores que deseñarán o futuro da xestión.
UN proxecto a medio prazo que pode mudar por completo a xestión do ciclo integral da auga en concellos como Negreira.
