Bisbarra, 19 de abril do 2023 – O concello de Negreira ven de presentar un avance da programación cultural de verán que chega cheo de citas musicais.
Coa concellaría de cultura de Negreira colabora tamén en esta programación a Rede Cultural da Deputación da Coruña. A primeira das citas será o sábado 13 de maio con Ailá. Un grupo co que falabamos en Lindeiros no seu primeiro disco e que veñen de presentar o seu segundo longa duración.
Ailá foron seleccionados para representar a Galicia no “Celtic Connection 2020” e ese mesmo ano gañaron o premio Interritmos. En Negreira estarán acompañados pola BANDA MUNICIPAL ATENEO cun repertorio preparado para celebrar a Semana das Letras Galegas
SÉS actuará o 16 de xuño. Diante un eco é o oitavo traballo discográfico da cantautora galega. Un título que fai referencia á concepción cíclica da historia, tristemente avalada pola deriva sociopolítica dos nosos días.
Diante un eco é tamén para SÉS unha volta aos inicios, pero desde o oficio e a madurez, e sobre todo desde unha visión alternativa da sofisticación, horizontal e intercultural. Unha sólida reafirmación na estética popular da que a cantora se considera amante e deudora, sen complexos e sen renunciar á calidade poética que a caracteriza.
O sábado 19 de agosto chega un grupo con ampla carreira e unha nutrida corte de seguidores. TREIXADURA traballa a música tradicional observada desde dúas concepcións ben arraigadas: o canto e a gaita. No seu percorrido foi transformando o seu estilo, sen renunciar ao seu son característico. Fieis ao compromiso co seu público, tentando elevar a música tradicional ao máximo nivel. Ao longo da súa traxectoria son moitas as melodías que rescataron do anonimato e outras tantas creadas para que a cadea de transmisión da música tradicional continúe viva.
Esa mesma xornada, o 19 de agosto, Leilía estará tamén en Negreira. Foron as pioneiras en tocar a pandeireteira nos seus concertos desde os seus inicios alá polo verán de 1989. Dende os anos oitenta percorreron as aldeas galegas recompilando músicas e bailes tradicionais. Mercedes Rodríguez, Montse Rivera e Felisa Segade facían parte da agrupación compostelá Cantigas e Agarimos. Felisa impartía, ademais, aulas de canto e pandeireta en Cacheiras. Alí entrou en contacto coas irmáns Ana e Rosario Rodríguez, e con elas configurouse o grupo.
En 1994, cos froitos das recollas de campo, publicaron o seu primeiro disco: Leilía. Un álbum de pouso etnográfico que mudou o panorama da música galega de raíz, pois até daquela esta asociábase principalmente á gaita, e non existían grupos de pandeireteiras que actuasen por si propias, separadas das formacións folclóricas.
Neste ano coa xira Vidas Cantadas, anunciaron a súa despedida dos escenarios, polo que Negreira será unha das últimas ocasións para desfrutar dun dos grandes referentes da nosa música tradicional.