Bisbarra, 1 de marzo do 2023 – A mestra María López Sandez recibirá o vindeiro 8 de marzo o galardón que outorga, para conmemorar esta data, o concello de Negreira.
Trátase da sétima edición de premio que naceu para recoñecer o traballo e o papel das mulleres vinculadas con Negreira ao longo da historia. María López Sández recibirá o premio o propio 8 de marzo as oito da tarde nun acto aberto que se celebrará no Auditorio Alfonso Eanes.
López Sandéz foi profesora do IES Xulián de Magariños durante trece cursos e deixou unha pegada en todo o seu alumnado. Desde o concello destacan que como mestra foi quen de transmitirlles moito máis que coñecementos teóricos, deixándolles dúas calidades que forman parte da súa traxectoria vital e profesional: a súa vocación didáctica e a súa paixón pola literatura. Dúas características que a acompañaron ao longo de toda a súa carreira e que, hoxe, avalan o seu rol como catedrática en excedencia de ensino secundario, como profesora na área de Didáctica da Lingua e a Literatura e tamén como vicedecana na facultade de Ciencias da Educación da Universidade de Santiago de Compostela (USC).
Mestra, investigadora e tamén autora. Nesta última faceta, López Sández tamén despuntou, colleitando varios galardóns: en 2007, recibiu o Premio de Ensaio Ramón Piñeiro pola obra Paisaxe e nación. A creación discursiva do territorio, no 2012 fíxose co Premio Repsol de Narrativa breve pola novela A forma das nubes e foi finalista do Premio Novela por Entregas de La Voz de Galicia (2014) coa súa obra “O Faro escuro” e do certame Raíña Lupa (2020) con “A noite da Deusa”.
O uso das humanidades dixitais e os sistemas de información xeográfica para a xeración de mapas literarios son dous dos seus campos de investigación. Un ámbito ao que hai que sumar, ademais, unha terceira figura central: a de Rosalía de Castro.
O seu firme compromiso coa lingua e a cultura galegas desde unha perspectiva multidisciplinar supuxo o seu nomeamento, no 2022, como Académica Electa de Número pola Real Academia Galega.