Bisbarra, 27 de marzo do 2023 – O concello de Negreira terá en seis meses un novo alumeado público con luces led que permitirá un 70% de aforro na factura da luz municipal.
O proxecto do novo alumeado cambiará 2.764 luminarias e os cadros de mandos correspondentes. O proxecto foi presentado polo alcalde, Manuel Ángel Leis Míguez; Félix Martín, de Aceínsa, empresa adxudicataria, e Joseba Pajuelo, director de Consultores de Eficiencia Enerxética.
O proxecto, presentado polo concello ao Ministerio para a Transición Ecolóxica, conta cun orzamento de dous millóns de euros dos que o estado financiará o 80%. O proxecto inclúe melloras na iluminación artificial dos campos de fútbol de Cepelo e o Jesús García Calvo, das canchas de tenis e pádel, no Complexo Deportivo Municipal de Pedra Mámoa, ou na praza das Brañas.
O alcalde de Negreira, Manuel Ángel Leis Míguez, destaca que a nova rede dotará á vila “da tecnoloxía máis eficiente no ámbito do alumeado público, cunha mellora da visibilidade no casco urbano e todas as parroquias”. Engade que “o aforro para as arcas municipais será moi importante, polo que teremos eses cartos para investir noutras necesidades”.
Por outra banda a renovación da rede permitirá ao concello “contar cun sistema de axuste dos horarios de acendido e do consumo en horario de madrugada, rebaixar os gastos de mantemento mediante o aumento da vida útil das luminarias e reducir a contaminación lumínica, cumprindo todas as normativas da Unión Europea”.
Por último, o proxecto inclúe o desenvolvemento dunha plataforma web de seguimento en tempo real do mapa lumínico do Concello, que permitirá detectar avarías, coñecer os consumos e facer unha xestión máis eficiente do sistema.