Bisbarra, 3 de abril do 2023 – O concello de Negreira inaugurou dúas novas infraestruturas de áreas moi distintas pero necesarias. O novo punto de atención temperá e un punto de información turística.
A nova sede de atención temperá ábrese tras a rehabilitación do edificio que acollía a antiga residencia dos mestres, anexa ao Colexio de Educación Infantil e Primaria (CEIP) O Coto. O alcalde, Manuel Ángel Leis, dixo que se trataba de “Un día importante e moi especial para o noso concello e sobre todo para as familias dos máis de 60 nenos e nenas que a día de hoxe reciben atención na unidade, un servizo prioritario para o noso grupo de goberno”.
A actuación contou cunha subvención do Instituto Galego da Vivenda e Solo (IGVS) por un importe de 40.000 euros, dos 58.256 euros en que quedou orzamentada a obra. Á inauguración asistiu Fernando González Abeijón, director xeral de Persoas con Discapacidade da Xunta.
Por outra banda o concello puxo en marcha, no lugar da Barquiña, un novo espazo cun punto de información turística. O acto contou coa presenza de Chefa Fernández, xerente do GDR Terras de Compostela. A actuación consistiu na reforma dunha edificación situada en plena ruta do Camiño a Fisterra, complementándoa cun novo inmoble.
Proximamente, habilitarase tamén un espazo que servirá de museo etnográfico do Concello de Negreira. As obras tiveron un orzamento de 87.590,69 euros. O alcalde, Manuel Ángel Leis, dixo en este acto que “O auxe do Camiño é imparable e quixemos concentrar nunha mesma ubicación un servizo de atención aos que chegan a Negreira cun espazo no que mostrar as nosas tradicións”.
