Bisbarra, 28 de outubro do 2024 – O concello de Negreira ven de rematar un plan de limpeza de marquesiñas e áreas recreativas de todo o concello. A isto engádese a limpeza de beirarrúas realizada polos distintos obradoiros de emprego.
Os traballos nas marquesiñas e áreas recreativas foron levados a cabo pola brigada municipal de obras. O obxectivo da iniciativa foi mellorar a imaxe de distintos espazos públicos e conseguir un entorno máis respectuoso coa veciñanza.
A campaña consistiu na limpeza a fondo de maleza, pintadas, retirada de carteis e lixo, e mellora da imaxe xeral. Establecéronse como prioritarias as marquesiñas pola climatoloxía sufrida nas últimas semanas e en previsión de que continúe o mal tempo de agora en diante.
O Concello de Negreira apela á colaboración da veciñanza para manter estas infraestruturas en boas condicións. Lembra ademais que a limpeza dos espazos públicos é unha responsabilidade compartida entre concello e veciñanza. Hai que destacar ademais que a normativa municipal prohibe a colocación de carteis publicitarios en zonas non habilitadas para ese uso.
Segundo o alcalde Manuel Ángel Leis, “este tipo de accións reforzan o noso compromiso co entorno e coa atención ás demandas dos nosos veciños e veciñas, sendo importante a colaboración de todos e todas para manter a nosa vila limpa e atractiva. Estamos aquí para servir e mellorar a calidade de vida en Negreira, sendo conscientes dos medios dos que dispoñemos e priorizando cada vez que programamos os traballos da brigada municipal”.
